Antîc pelegrinaç patriarcjâl

Home Trois Troi Furlan Antîc pelegrinaç

Lant sul Santuari di Mont Sante dal Lussari

L'Iter al è un Pelegrinaç, no maiôr (tant che chei che a condusevin a Rome, Jerusalem e Sant Jacum di Galizie), ma nancje minôr (ven a stâi che al à par mete un singul Santuari de Regjon); chel “al lee” Aquilee, sede dal antîc patriarcjât, ae Mont Sante dal Lussari, dulà che al è il Santuari, ma tocjant tantis altris glesiis, localitâts, e citâts tant impuartantis inte nestre storie.

La ricostruzion dal antîc troi si poie di fonts storichis, documents scrits, elements dal paisaç, costruzions artistichis votivis, ma ancje des testemoneancis dai anzians. Al è un percors de memorie, par cierts aspiets invisibil, ma dal moment che o sin rivâts a fâlu prime e segnâlu su lis mapis dopo, lu vin puartât ae lûs, ma dome percorintlu di gnûf, al deventarà VÊR.

Fasint chest Iter, chest Troi, si passe pal Friûl dal mâr aes monts, si passe dongje gleseutis votivis, si è vuidâts di anconis antighis, e si puedin ricognossi segns di antîcs centris di acet, centris gjestîts di ordins monastics e cavalarescs.

L’Iter, che in curt si fasarà lant daûr dai segns celescj, al è un colegament intuît, ricostruît tape par tape, parcè che la ferovie, lis stradis gnovis, i puints e lis trasformazions dai paîs, a àn cancelât, movût, deviât tancj segns di viis antighis che i nestris vons a fasevin. Però i tignìn a sotlineâ che cheste Vie e je stade cirude, sperimentade e valutade, ancje dopo vê scoltât la propueste di anzians che ben a ricuardin cemût che par vecjo a rivavin li des diviersis glesiis, ancje chês plui lontanis, a pît.

Se il segn distintîf dal Troi al è chel patriarcjâl, il secont al è chel Marian, par chest si clame ancje, par talian, "Cammino Celeste", stant che al unìs lûcs di devozion mariane antighe; tant numerosis a son lis anconis, lis ediculis e lis imagjins di Marie, che nus acompagnin dilunc de Vie. E intant che si cjamine e si procêt, si pues gjoldi de presince di piçui tesaurs artistics pôc cognossûts, e in gracie dal pas lent si pues osservâ la modificazion dal paisaç: la lagune, la planure, i flums, i paîs, i vignâi inte zone dal Cuei, lis diviersis Vals cui rispetîfs flums, lis monts des Prealps e chei des Alps Juliis che nus vignaran incuintri. Ancje la orele e ricognossarà i passaçs di une zone a chê altre, stant che tancj a son i dialets e lis lenghis che nus compagnaran pas daûr pas.

Ma l'Iter nol è un troi sierât dentri de nestre regjon, stant che de Austrie e de Slovenie o vin ativât altris doi Trois che a puartin su la Mont Sante dal Lussari, cussì insiemi o vin ricostruît chei puints invisibii, che a colegavin i nestris paîs di di là dal confin. In efiets la nestre regjon, propit pe posizion gjeografiche che e cjape, e je stade di simpri "tiere di passaç" par cui che al rivave dal Est, tant che dal Ovest, dal Nord, tant che dal mâr. Vierzìnsi la puarte tra vicins e lontans.

Metìnsi a cjaminâ sul Iter Aquileiense, cjatìnsi "iterum", di gnûf.

Ogni Troi al è fat di pas antîcs e gnûfs: chest Troi al spiete i tiei!